Wednesday, January 28, 2015

சாரும் ரைட்டரா

ஏகப்பட்ட ஜூனியர்கள் புடைசூழ பெருமாள்முருகனுக்கான சீனியர் கவுன்சிலாய் இணையத்தில் கோலோச்சிக்கொண்டிருந்த நல்கை கவுன்சிலிங் அறிஞர் ராஜன் குறை கிருஷ்ணன் தமது கட்சிக்காரர் போலவே தாமும் எழுதியதையெல்லாம் வாபஸ் வாங்கிக்கொண்டு ஃபேஸ்புக் அக்கவுண்டையே மூடிவிட்டாராம் அதி தீவிர நக்ஸலைட்டு ஏழரையாய். 

இதை எழுதி முடிக்கும் கணத்திலிருந்து நான் எதையுமே எழுதாமல்கூட உடனடியாகவோ அல்லது பல காலம் இருந்தோ இறந்துவிடக்கூடும். ஆனால், இலக்கியவாதிகள் பலராலும் எரிச்சலுடன் பார்க்கப்படும் என் பிளாகில் இருக்கும் 'குப்பைகள்' அனைத்தும் இன்னும் பிறக்கக்கூட இல்லாத, முகமறியா பலரும் படிக்க வசதியாய், இருந்துகொண்டு இருக்கவேண்டும் என்கிற ஆசையில் அது தொடர்ந்து இயங்கிக் கொண்டு இருப்பதற்கான நிதியை என் சொந்தப் பணத்திலிருந்து ஒதுக்கிவைத்துவிட்டே இந்த உலகைவிட்டுச் செல்வேன்.

எழுதும் என்றால், அது எழுதியது அச்சாகிப் புத்தக வடிவமும் பெறும் என்றால் சவத்தைக்கூட எழுத்தாளன் என்றுதான் குறிப்பிடும் உலகம். 

என்ன மயிர்ப்பிடுங்கி இலக்கியம் எழுதியிருந்தாலும் எழுதும் முன் யோசிக்காமல், எதிர்ப்பு வந்தால் ஊர் வாய்க்கு பயந்து, எழுதியதையெல்லாம் ஊத்தி மூடிவிட்டு ஓடிப்போகும் எவனையும் எழுத்தாளன் என்று நான் என்றும் மதிக்கமாட்டேன். 

புகழை மட்டுமன்று அவமானங்களையும் கடந்தவனே, எழுத்தாளன் என்று தன்னைக் குறிப்பிட்டுக்கொள்ளும் தகுதியை உடையவன். மற்றபடி, இணையத்தில் எல்லாப் பயலும்தான் போட்டுக் கொள்கிறான் ஃபேஷனாய் பேருக்கு முன்னால் ரைட்டர் என்று.